Kompatibelnosć

Podawa nastajenja kompatibelnosće za tekstowe dokumenty. Tute nastajenja při optimowanju LibreOfficeDev pomhaja, hdyž so dokumenty Microsoft Word importuja.

Wotstup mjez wotstawkami a tabelemi přidać

W LibreOfficeDev Writer so wotstawkowy wotstup hinak hač w dokumentach Microsoft Word definuje. Jeli sće wotstup mjez dwěmaj wotstawkomaj abo tabelomaj definował, so tež wotstup we wotpowědnych dokumentach Word přidawa.

Podawa, hač so ma wotstup, kotryž je z Microsoft Word kompatibelny, mjez wotstawkami a tabelemi w tekstowych dokumentach LibreOfficeDev přidać.

Wotstawkowy a tabelowy wotstup horjeka na prěnjej stronje a łamanja strony přidać

Podawa, hač wotstawkowy wotstup horjeka na stronje so tež na spočatku strony abo špalty wuskutkuje, jeli wotstawk so na prěnjej stronje dokumenta pozicioněruje. Samsne za łamanje strony płaći.

Tabulatorowe formatěrowanje OpenOffice.org 1.1 wužiwać

Podawa, kak so ma tekst na tabulatorach za prawej kromu wusměrić, kak maja z decimalnymi tabulatorami wobchadźeć, a kak maja z tabulatorami blisko łamanja linki wobchadźeć. Jeli tutón kontrolny kašćik wubrany njeje, wobchadźeja z tabulatorami na samsne wašnje kaž w druhich nałoženjach Office.

W tekstowych dokumentach, kotrež su so přez aktualnu wersiju Writer wutworili, so nowe wobchadźenje z tabulatorami po standardźe wužiwa. W tekstowych dokumentach, kotrež su so přez wersije Writer před Staroffice 8 abo OpenOffice.org 2.0 wutworili, so stare wobchadźenje z tabulatorami nałožuje.

(Přidatnu) mjezeru mjez tekstowymi linkami njepřidać

Podawa, zo so přidatny wotstup (rozćehnjenje) mjez linkami njezasadźuje, byrnjež pismo, kotrež so wužiwa, atribut za přidatny wotstup wobsahowało.

W tekstowych dokumentach, kotrež su so přez aktualnu wersiju Writer wutworili, so přidatny wotstup po standardźe wužiwa. W tekstowych dokumentach, kotrež su so přez wersije Writer před Staroffice 8 abo OpenOffice.org 2.0 wutworili, so přidatny wotstup njewužiwa.

Linkowy wotstup OpenOffice.org 1.1 wužiwać

Jeli tute nastajenje je znjemóžnjene, so nowy proces za formatěrowanje tekstowych linkow z proporcionalnym linkowym wotstupom nałožuje. Jeli tute nastajenje je zmóžnjene, so předchadna metoda formatěrowanja tekstowych linkow z proporcionalnym linkowym wotstupom nałožuje.

W tekstowych dokumentach wutworjenych přez aktualnu wersiju Writer a w dokumentach Microsoft Words najnowšich wersijow so nowy proces wužiwa. W tekstowych dokumentach wutworjenych přez wersije Writer před StarOffice 8 abo OpenOffice.org 2.0 so předchadny proces wužiwa.

Wotstawkowe a tabelowe wotstupy na kóncu tabelowych celow přidać

Podawa, zo so delni wotstup wotstawkej přidawa, samo hdyž je posledni wotstawk w tabelowej celi.

Jeli tute nastajenje je znjemóžnjene, so tabelowe cele kaž we wersijach Writer před StarOffice 8 abo OpenOffice.org 2.0 formatěruja. Jeli tute nastajenje je zmóžnjene, so alternatiwna metoda formatěrowanja tabelowych celow nałožuje. Tute nastajenje je po standardźe za nowe dokumenty zmóžnjene, kotrež su so z LibreOfficeDev wutworili, a za dokumenty, kotrež su so z formata Microsoft Word importowali.

Objektowe pozicioněrowanje OpenOffice.org 1.1 wužiwać

Podawa, kak so ma pozicija znošowacych so objektow wuličić, kotrež su na znamješku abo wotstawku nastupajo horni a delni wotstup wotstawka zakótwjene.

Jeli tute nastajenje je zmóžnjene, so znošowace so objekty kaž we wersijach Writer před StarOffice 8 abo OpenOffice.org 2.0 pozicioněruja. Jeli tute nastajenje je znjemóžnjene, so znošowace so objekty z pomocu alternatiwneje metody pozicioněruja, kotraž je metodźe podobna, kotruž Microsft Word wužiwa.

Tute nastajenje je za nowe dokumenty po standardźe znjemóžnjene. Za dokumenty Writer wutworjenych před OpenOffice.org 2.0 je tute nastajenje zmóžnjene.

Tekstowy wobběh wokoło objektow OpenOffice.org 1.1 wužiwać

Po standardźe so wobsah hłowoweje a nohoweje linki strony kaž tež wobsah nóžki a kónčneje nóžki wokoło wisatych objektow wobrazowki njeběža. Tute zadźerženje špiheluje, kak Microsoft Word z tutym objektami wobchadźa. Zo byšće tekstowy běh wokoło wisatych objektow wobrazowki we hłowowych/nohowych linkach abo nóžkach/kónčnych nóžkach zmóžnił, wubjerće tute nastajenje.

Jeli nastajenje je wupinjene, štož je standard, so nowy tekstowy běh nałoži.

Wobběhowy stil při pozicioněrowanju objektow wobkedźbować

Podawa, kak ma kompleksny proces pozicioněrowanja znošowacych so objektow, kotrež su na znamješku abo wotstawku zakótwjene, fungować. We wersijach Writer před StarOffice 8 abo OpenOffice.org 2.0 je so iteratiwny proces wužiwał, mjeztym zo so w aktualnych wersijach jednory proces wužiwa, kotryž je samsnemu procesej w Microsoft Word podobny.

Jeli tute nastajenje je znjemóžnjene, so stary iteratiwny proces LibreOfficeDev objektoweho pozicioněrowanja wužiwa. Jeli tute nastajenje je zmóžnjene, so nowy jednory proces wužiwa, zo by kompatibelnosć z dokumentami Microsoft Word zawěsćił.

Wusměrće linki z manuelnym łamanjom linki we wusměrjenych wotstawkach

Jeli tute nastajenje je zmóžnjene. Writer wotstup mjez słowami w linkach zasadźuje, kotrež so z Umsch (⇧)+Enter we wotstawkach z blokowej sadźbu kónča. Jeli tute nastajenje je znjemóžnjene, so wotstup mjez słowami njerozšěrja, zo njebychu so linki w blokowej sadźbje wusměrili.

Tute nastajenje je za tekstowe dokumenty .odt po standardźe zmóžnjene. Składuje a začituje so z dokumentom w formaće tekstoweho dokumenta .odt. Tute nastajenje njeda so w starych tekstowych dokumentach .sxw składować, tohodla je tute nastajenje za tekstowe dokumenty .sxw znjemóžnjene.

Formular škitać (nješkita hižo cyły dokument. Zasadźće wotrězk škitany přećiwo pisanju město toho)

Hdyž so formulary z Microsoft Word importuja, so wobsah dokumenta zwonka wodźenskich elementow formulara zawrěja a da so jenož jako přećiwo pisanju škitany importować. Tute nastajenje wam zmóžnja, dokument wobdźěłać, hdyž wodźenske elementy w škitanych wotrězkach zapřijimaće.

Přewisowace mjezoty kompatibelne z Word

Zawěsćće, zo kónčne mjezoty a jich wuzběhnjenje su kompatibelne z Microsoft Word. Tute nastajenje je po standardźe za importowane formaty Microsoft Word (.doc, .docx, .rtf) zmóžnjene. Za dataje ODF je tute nastajenje po standardźe znjemóžnjene.

Běłe linije tolerować, kotrež móža so na pozadkach PDF-strony jewić

Wužiwajće zakótwjenje rysowanskeho porjada a tolerěrujće běłe linije, kotrež so móhli na pozadkach strony PDF jewja, kotrež su so přez stare dokumenty wutworili.

Wotstawki polow serijoweho lista z prózdnej hódnotu schować, hdyž so serijowy listy generěruja

Hdyž tute nastajenje je aktiwne, wobchadźeja z polemi datoweje banki, kotrež su prózdne, kaž ze schowanymi wotstawkowymi polemi. Nastajenje je po standardźe zmóžnjene a nałožuje so awtomatisce na nje-ODF-dokumenty (zo by so kompatibelnosć z druhimi běrowowymi paketami zawěsćiła). Za eksistowace dokumenty ODT nastajenje znjemóžnjene wostawa, jeli nastajenje njeje so do toho konfigurowało pod wobchowowanjom wuhotowanja zestarjenych dokumentow.

Škitane mjezoty (NBSP) jako standardnu šěrokosć za mjezoty zwobraznić (za krutu wulkosć znjemóžnjene)

Hdyž tute nastajenje je zmóžnjene (na přeće za stare a nowe dokumenty), škitana mjezota hižo striktnje njezměnitu šěrokosć nima. Hdyž nastajenje je znjemóžnjene, ma škitana mjezota (znamješko NBSP) přeco šěrokosć standardneje mjezoty (U+0020) na datej lince. Tuta změna da so jenož pytnyć, hdyž wotstawk je w blokowej sadźbje wusměrjeny.

Nimo toho, hdyž so njećišćomne znamješka pokazuja, so nětko tilda (~) abo stopnjowy symbol (°) město škitaneje mjezoty (NBSP) zjewi, dokelž šěre polo same husto widźomne njeje.

Přidatny wotstup za ličbu w nóžkach / kónčnych nóžkach z wisatej prěnjej linku njepřidać

Tute nastajenje přidatny wotstup mjez čisłom nóžki a jeje tekstom wotstronja, hdyž wotstawk ma wisate zasunjenje kaž na přikład w Microsoft Word.

Tabulatory relatiwnje k zasunjenju wotstawka nastajić

Tute nastajenje wšě tabulatorowe pozicije wotstawka relatiwnje k lěwej kromje strony wusměrja, nic k zasunjenju wotstawka.

Rajtarkam dowolić, so wyše praweje kromy wupřestrěć

Hdyž tute nastajenje je zmóžnjene, móže so wotstawkowe tabulatory přez prawu kromu won wupřestrěwać. Hdyž je znjemóžnjene, so tabulatory za prawej kromu ignoruja.

Nješpihelujće rysowanske objekty zakótwjene we wotstawkach z pisanskim směrom wotprawa dolěwa

Writer rysowanske objekty awtomatisce špiheluje, kotrež su we wotstawkach z pisanskim směrom wotprawa dolěwa (RTL) zakótwjene, Microsoft Word wšak to nječini. Hdyž tute nastajenje je zmóžnjene (za dataje DOCX), Writer poziciju rysowanskich objektow awtomatisce nješpiheluje, prosće, dokelž su w tekstowym suku RTL zakótwjene.

Rysujće kónčne nóžki na kóncu dokumenta w teksće, nic na separatnej stronje

Po standardźe Writer kónčne nóžki na jednej stronje abo na wjacorych stronach placěruje, mjeztym zo Microsoft Word je w lince na kóncu dokument pozicioněruje, za samym tekstowym wobsahom. Tute nastajenje specielny wotrězk na runinje wuhotowanja wutworja a placěruje kónčne nóžki znutřka tutoho wotrězka a zapasuje je efektiwnje.

Pismowu metriku za tekstowu lěsycu a aziski tekst wužiwać, kotraž je z Word kompatibelna

Hdyžkuli Microsoft Word pismo CJK wužiwa, zo by tekst wuhotował, nałožuje přidatny multiplikator na wysokosć linki. Tute zadźerženje jenož wot pismoweje dataje sameje wotwisuje – njehraje žanu rolu, hač pismo je jako wuchodoaziske pismo nastajene abo hač tekst znamješka CJK wobsahuje. Jenički postajacy faktor je, hač so pismo same jako pismo CJK identifikuje.

Jeli pismo wotpowědnosć z někotrej ze slědowacych kodowych stronow zdźěla, so multiplikator linkoweje wysokosće nałožuje:

• CP932 (JIS/Japanska)

• CP936 (zjednorjena chinšćina)

• CP949 (Korejske kodowanje Wansung)

• CP950 (tradicionelna chinšćina)

Writer by originalne metriki pisma respektował, hdyž so dataje DOC/DOCX wuhotuja. Tuta změna da Writer pospytować, zadźerženje Microsoft Word emulować, po wariabli kompatibelnosće.

Zadźěwać tomu, zo wysokosć prózdneho znamješka linkowu wysokosć wobwliwuje

Wotstronja hódnotu wysokosće znamješkow mjezotu a tabulator (↹) z wobličenja linkoweje wysokosće. Tute nastajenje je w dokumentowych datajowych formatach Microsoft Word po standardźe zmóžnjene.

Přewisowace mjezoty kompatibelne z Word podšmórnyć

Nastajenje kompatibelnosće Kónčne mjezoty podšmórnyć Microsoft Word. Prjedy je so funkcija zadźeržał, kaž by tute nastajenje přeco zmóžnjene było, mjeztym zo je po standardźe znjemóžnjene we Word.

Přiměrće mjezoty na poł šěrokosće ideografiskich mjezotow z pomocu prawidłow, kotrež su z Word kompatibelne

Hdyž nastajenje je zmóžnjene, Writer šěrokosć wěstych normalnych mjezotow na połojcu šěrokosće ideografiskeje mjezoty CJK přiměrja. Tute přiměrjenje so jenož na spočatne a kónčne mjezoty, wjacore mjezoty za sobu a mjezoty mjez znamješkami CJK nałožuje.

Tuta wariabla so awtomatisce zmóžnja, hdyž so dataje DOCX ze zmóžnjenym nastajenjom w:balanceSingleByteDoubleByteWidth importuja, a tež, hdyž so dataje DOC z njenastajenej wariablu kompatibelnosće fDntBlnSbDbWid importuja.

Přiměrće wysokosće linkow do lěsyčnej wysokosće w tabeli

Za tekstowe dokumenty CJK, kotrež tekstowu lěsycu CJK wužiwaja, so ličba linkow na stronu a ličba znamješkow na linku w předłoze strony podawaja. W normalnym padźe so ličba linkow na stronu tež tabele wobwliwuje. Tute nastajenje kompatibelnosće te zadźerženje znjemóžnja a zawěsćuje, zo tabele přez nastajenje lěsyčnych linkow na stronu njewobwliwowane wostawaja. Nastajenje je so zawjedło, zo by podobnej funkciji w Microsoft Word wotpowědowało, kotrež dowoluje, zo tute dokumenty so korektnje rysuja.

Wotstawkowe směry za wusměrjenje lisćinoweho popisa ignorować

Writer nětko směr lisćinoweho popisa nałožuje a zawěsćuje, zo wusměrjenje spočatneho a kónčneho popisa wusměrjenju spočatneho a kónčneho wotstawka wotpowěduje. Hdyž tute nastajenje je zmóžnjene, Writer wotstawkowy směr za lisćinowe popisy ignoruje a wužiwa přeco wusměrjenje wotlěwa doprawa.

Zo by so wuhotowanje eksistowacych dokumentow wobchowało, so tuta wariabla awtomatisce zmóžnja, hdyž so ODF, kotryž je so ze staršimi wersijemi LibreOfficeDev wutworił, začita.

Jako standard wužiwać

Klikńće, zo byšće aktualne nastajenja na tutym rajtarku jako standard za přichodne posedźenja z LibreOfficeDev wužiwał.

Zawodne přednastajenja su tak nastajene. Zmóžnjene su slědowace nastajenja, mjeztym zo wšě druhe nastajenja su znjemóžnjene:

1. Wotstup mjez wotstawkami a tabelemi přidać

2. Wotstawkowy a tabelowy wotstup horjeka na prěnjej stronje a łamanja strony přidać

3. Wotstawkowe a tabelowe wotstupy na kóncu tabelowych celow přidać

4. Linki z manuelnymi linkowymi łamanjemi we wusměrjenych wotstawkach wusměrić

5. Wotstawk polow serijoweho lista z prózdnymi hódnotami schować, hdyž so serijowe dokumenty generěruja.

6. Tabulatory (↹) relatiwnje k zasunjenju wotstawkow nastajić